ന്യൂഡൽഹി: സർക്കാർ ജീവനക്കാർക്ക് ലഭിക്കുന്ന തൊഴിൽസുരക്ഷയ്ക്കും പെൻഷൻ ആനുകൂല്യങ്ങൾക്കും അനുസൃതമായ ഉത്തരവാദിത്വം ഉണ്ടാകുന്നുണ്ടോയെന്ന് സുപ്രീംകോടതി ജഡ്ജി ജസ്റ്റിസ് ബി.വി. നാഗരത്ന. പഞ്ചാബിലെ സർക്കാർ ജീവനക്കാർക്ക് ക്ഷാമബത്ത നൽകാത്തതുമായി ബന്ധപ്പെട്ട കേസിന്റെ വാദത്തിനിടെയായിരുന്നു പരാമർശം. ഉത്തരവാദിത്വം ഉറപ്പാക്കാൻ ഭാവിയിൽ സർക്കാർ നിയമനങ്ങൾ കരാർ അടിസ്ഥാനത്തിലാക്കണമെന്ന അഭിപ്രായവും അവർ വാക്കാൽ പ്രകടിപ്പിച്ചു.
ജസ്റ്റിസ് നാഗരത്നയും ജസ്റ്റിസ് ആർ. മഹാദേവനും ഉൾപ്പെട്ട ബെഞ്ചാണ് കേസ് പരിഗണിച്ചത്. ജീവനക്കാർക്ക് നൽകേണ്ട തുക അനുവദിക്കാൻ മതിയായ പണമില്ലെന്ന് സംസ്ഥാന സർക്കാർ ഹൈക്കോടതിയിൽ നിലപാടെടുത്തിരുന്നു. എന്നാൽ, സൗജന്യ ആനുകൂല്യ പദ്ധതികൾ ഉൾപ്പെടെയുള്ളവയ്ക്കായി സർക്കാർ ചെലവഴിക്കുന്ന കാര്യം ഹൈക്കോടതി ചൂണ്ടിക്കാട്ടിയിരുന്നു. സുപ്രീംകോടതിയിലും ജീവനക്കാരുടെ അഭിഭാഷകർ ഈ വിഷയം ഉന്നയിച്ചു.
ഈ പശ്ചാത്തലത്തിൽ, സർക്കാർ ജീവനക്കാർ പ്രത്യേക ആനുകൂല്യങ്ങൾ ലഭിക്കുന്ന വിഭാഗമാണെന്നും സൗജന്യ ക്ഷേമപദ്ധതികൾ സമൂഹത്തിലെ പാർശ്വവത്കരിക്കപ്പെട്ടവരെ ലക്ഷ്യമിടുന്നതാണെന്നും ജസ്റ്റിസ് നാഗരത്ന അഭിപ്രായപ്പെട്ടു. ജീവനക്കാരുടെ പ്രവർത്തനക്ഷമതയെ വിമർശിച്ച അവർ, ചിലർ ദിവസം മൂന്ന് പേജ് മാത്രം ടൈപ്പ് ചെയ്യുന്നുവെന്നും കോടതികളിൽ നിയമനം നേടിയശേഷം സെക്രട്ടേറിയറ്റിലേക്ക് പോകാൻ താത്പര്യപ്പെടുന്നുവെന്നും പരാമർശിച്ചു.
എല്ലാ സർക്കാർ ജീവനക്കാരെയും ഒരേ രീതിയിൽ വിലയിരുത്താനാകില്ലെന്നും കഠിനാധ്വാനം ചെയ്യുന്ന നിരവധി ജീവനക്കാരുണ്ടെന്നും ജീവനക്കാർക്കുവേണ്ടി ഹാജരായ മുതിർന്ന അഭിഭാഷകൻ ദേവദത്ത് കാമത്ത് ചൂണ്ടിക്കാട്ടി. സർക്കാർ ജീവനക്കാർ അത്രത്തോളം ആത്മാർഥമായി പ്രവർത്തിച്ചിരുന്നെങ്കിൽ രാജ്യത്തെ വ്യവഹാരങ്ങളുടെ എണ്ണം കുറയുമായിരുന്നുവെന്ന് ജസ്റ്റിസ് നാഗരത്ന പ്രതികരിച്ചു. സർക്കാർ മാതൃകാ തൊഴിലുടമയായി പ്രവർത്തിക്കണമെന്ന് കാമത്ത് മറുപടി നൽകി.
ജീവനക്കാരുടെ മരണശേഷം കുടുംബാംഗങ്ങൾക്ക് ലഭിക്കേണ്ട പെൻഷൻ അനുവദിക്കുന്നതിൽപ്പോലും ഉദ്യോഗസ്ഥതലത്തിൽ തടസ്സങ്ങളുണ്ടാകുന്നതായും ജസ്റ്റിസ് നാഗരത്ന വിമർശിച്ചു. ചുവപ്പുനാടയും നടപടിക്രമങ്ങളിലെ തടസ്സങ്ങളും ചൂണ്ടിക്കാട്ടിയ അവർ, സർക്കാർ ജീവനക്കാരുടെ ഉത്തരവാദിത്വം എവിടെയാണെന്ന് ചോദിച്ചു.
അതേസമയം, പഞ്ചാബ് ചീഫ് സെക്രട്ടറിക്കെതിരായ കോടതിയലക്ഷ്യ നടപടികൾ സുപ്രീംകോടതി സ്റ്റേ ചെയ്തു. ഇത്തരത്തിൽ സമ്മർദം ചെലുത്തുന്ന സമീപനത്തെ അംഗീകരിക്കാനാകില്ലെന്ന് ബെഞ്ച് വ്യക്തമാക്കി.
കരാർ നിയമനം സംബന്ധിച്ച പരാമർശങ്ങൾ വാദത്തിനിടെയുള്ള വാക്കാലുള്ള അഭിപ്രായങ്ങളാണ്; സർക്കാർ നിയമനങ്ങൾ കരാർ അടിസ്ഥാനത്തിലാക്കാനുള്ള കോടതി ഉത്തരവല്ല.
